Amdanom Ni

Croeso i wefan Ysgol Gymraeg Dyffryn y Glowyr.  Bwriad y wefan yw darparu gwybodaeth angenrheidiol am drefniadaeth a chwricwlwm yr ysgol yn ogystal â gwybodaeth am y digwyddiadau a’r gweithgareddau niferus sy’n rhan o’r ddarpariaeth allgyrsiol.

Agorwyd Ysgol Gymraeg Dyffryn y Glowyr yn Ionawr 2013 mewn adeilad newydd gyda chyfleusterau pwrpasol. Mae’r ysgol yn ysgol ardal gyda phlant yn dod o dalgylch eang.  

Cymraeg yw iaith swyddogol yr ysgol.  Yn y dosbarthiadau Derbyn, Blwyddyn 1 a Blwyddyn 2 y Gymraeg yw prif gyfrwng y dysgu. Yn y dosbarthiadau iau, defnyddir y Gymraeg a’r Saesneg fel cyfrwng dysgu gyda’r nod o alluogi’r disgyblion i ddod yn gwbl ddwyieithog erbyn amser trosglwyddo i’r ysgol uwchradd.

Nod yr ysgol yw rhoi cyfle i bob disgybl i wireddu ei lawn botensial mewn amgylchedd gofalgar a chefnogol.  Yr ydym yn anelu at sicrhau bod ein disgyblion yn cyflawni’n safonau uchaf posibl ac yn darparu pob cymorth iddynt wireddu hyn.  Yn ogystal, rhown flaenoriaeth uchel i ddatblygiad personol a chymdeithasol ein disgyblion er mwyn eu cynorthwyo i ddatblygu’n ddinasyddion aeddfed a chyfrifol  i’r dyfodol.